Nog adres

Серби цæттæ у Хуссар Ирыстон æмæ Абхазы хæдбардзинады тыххæй фарстамæ æркæсынмæ

tomislav_0.jpgУæрæсе цæттæ у Сербийæн ноджыдæр иу стыр кредит радтынмæ, Серби та - Хуссар Ирыстон æмæ Абхазы хæдбардзинад банымайыны тыххæй фарстамæ æркæсынмæ. Ахæм уыдысты, дыууæ бæстæйы президенттæн Мæскуйы цы баныхæстæ уыдис, уыдоны фæстиуджытæ. Косовойæн, Сербийы ног сæвзæрст къухдариуæггæнæджы ныхæстæм гæсгæ, хæдбардзинад райсыны бар нæй.
Сербийы парламент гæнæн ис æввахс рæстæджы æркæса Хуссар Ирыстон æмæ Абхазы хæдбардзинад банымайыны фарстамæ, фехъусын кодта аивгъуыйгæ сабаты «Эхо Москвы» - йы радиостанцæн интервьюйы Сербийы президент Томислав Николич. Уыцы бон ма Уæрæсейы президент Владимир Путинимæ фембæлды Николич дзырдта, зæгъгæ, Серби йæ фæндаг дары Евроцæдисмæ. «Æз нырма нæ фехъуыстон, кæй ис ахæм уавæр, цæмæй мах хъуамæ банымайæм Косово æмæ Метохийы хæдбардзинад. Уый махæн нæ бон саразын нæу, æгæрыстæ-мæй нæ уыцы рæстæджы æппæт баныхæстæ æруромын куы бахъæуа, уæд дæр», - фехъусын кодта Николич.
Сербийы президент цæхгæр ныхмæ у Косовойы проблемæ хæстон æгъдауæй аскъуыддзаг кæныны. «Мах стæм баныхæсты æмæ фидæны ахастытæ иумæ сбæлвырд кæныны æвварс», - загъта уый.
Сербаг президентимæ фембæлды рæстæджы Путин йæ рады ныфс бавæрдта, Сербийæн кредиты дыккаг транш - 800 милуан доллары рахицæн кæны-нæй. Йæ ныхæстæм гæсгæ уыцы æхцатæ хъуамæ хардз æрцæуой инфраструктурон проектты рæзтыл.
Ивгъуыд аз Уæрæсе Сербийæн радта кредит 200 милуан доллары бæстæйы бюджет фидардæр кæнынæн. Путин банысан кодта, дыууæ бæстæйы ‘хсæн товарæрзылд кæй фæфылдæр 1,5 хатты, Сербийы Уæрæсейы бакæнгæ инвестициты æмвæзад та схæццæ 1,4 миллиард доллармæ.
Николич дæр банысан кодта, Уæрæсе Сербийы кæй ссис ахсджиаг инвестор, афтæ ма «ИНО-йы Æдасдзинады Советы Сербийы царды ахсджиаг интересты фидар хъахъхъæнæг, уæлдайдæр та Косово æмæ Метохийы фарстаты фæдыл». «Мæ бæллиц у, цæмæй Серби суа Уæрæсейы стратегион партнер», - загъта президент.