Nog adres

Юбилей/ Стыр лæджы ном мысæн изæр

iubilei_0.jpg
Бæстæ адæмæй бæстæ у, адæм та сæ разагъды лæгтæй адæм сты. Ирыстон, дзырд дæр ыл нæй, йæ адæмы чысыл нымæцмæ гæсгæ разагъды лæгтæй цух никуы уыд æмæ нæу. Уыцы номы лæгтæй сæ иу уыд Тыбылты Алыксандр - номдзыд æхсæнадон архайæг, ахуыргонд, публицист, литературон критик, Хуссар Ирыстоны паддзахадон педагогон институты бындурæвæрæг.
Ацы аз Алыксандры райгуырдыл сæххæст 125 азы. Ахæм лæджы юбилей банысанкæнинаг у кæддæриддæр, фæлæ, цæмæдæр гæсгæ «айрох» дзæвгар рæстæджы дæргъы. Ныр бузныг, йæ ном чи хæссы, уыцы университетæн, Хуссар Ирыстоны дзыллæйæн, нæ номдзыд лæджы ном кæй ссардтой.
22 майы нæ республикæйы Профцæдисты Культурæйы галуаны уыд Тыбылты Алыксандры юбилейон изæр. Бацæттæ йæ кодта нæ паддзахадон университет, йæ организатор уыд Алыксандры хæдзарвæндаджы æввахсдæр къабæзтæй иу - Тыбылты Ингæ - университеты ирон-уырыссаг факультеты декан.

Тыбылоны уæлдай ма Тыбылты Алыксандры цард æмæ сфæлдыстадыл æрдзырдтой профессортæ Медойты Боболкæ æмæ Плиты Гацыр, университеты ректор Кокойты Таймураз, уырыссаг æмæ фæсарæйнаг кафедрæйы хистæр ахуыргæнæг Тыбылты Инал æмæ Тыбылты Алыксандры чызджы чызг Дзасохты Елдæ.
Юбилейон изæры хайад райста æмæ дзы раныхас кодта нæ республикæйы Президент Тыбылты Леонид. Президент куыд бафиппайдта, афтæмæй Тыбылты Алыксандры хуы-зæн лæгтæ æрмæст сæ мыггагæн кадгæнæг нæ вæййынц, фæлæ æппæт нацийæн, сæ Фыдыбæстæйæн. Ахæм лæгтæн хъæуы аргъ кæнын æмæ кад кæнын, сæ цæвиттойнаг цардвæндагыл рæзгæ фæлтæры æфтауын.
ybilei_0.jpg Алыксандры дæр, куыд Ирыстоны уæды разагъдты лæгты, афтæ бацæрæфтыд кодта æртын æвдæм азы тугуарæн рæстæг. Абон Ирыстоны цæгат æмæ хуссары дæр бирæтæ кæй номæн табу кæнынц, уыцы Джугъашвили-Сталины бархъомысæй Ирыстоны куынæг æрцыд фынддæс мины бæрц патриоты. Хуссар Ирыстоны скуынæг кодтой Гаглойты Рутены - дыууæ Иры 'хсæн фæндаг саразын кæй сфæнд кодта, уый тыххæй, Беджызаты Чермен æмæ Хъуылаты Созырыхъойы - ссæдзæм азы геноцидыл кæй фыстой, уый тыххæй, Тыбылты Алыксандры - Хуссар Ирыстонæн уæлдæр ахуыргæнæндон кæй сарæзта, уый тыххæй, æмæ афтæ дарддæр. Иу дзырдæй, Сталины æргæвдæн кард карста, ирон удыхъæд кæмæн уыд, Ирыстоны рæсугъд фидæныл чи хъуыды кодта, уыдоны се 'ппæты дæр.
Тыбылты Алыксандры фыднадæй ныккæнды куы ныппæрстой, йæ адзал куы базыдта, уæддæр ма стæлфыд йæ ирон уд æмæ, йемæ ахст чи уыд, уыцы лæппутæм бахатыд: «Ирон зарæг мын акæнут, Хазбийы зарæг».
Хуыцау макуыуал æруадзæд ахæм рæстæг!
Ахæм уыд йæ раныхасы сæйраг мидис Алыксандры чызджы чызг Дзасохты Елдæйæн. Уый ма радзырдта, йæ дадайы тыххæй Галаты Барис æмæ æндæрты мысинæгтæй скъуыддзæгтæ.
Юбилейон изæр барæсугъд кодтой нæ республикæйы аивады архайджытæ. Дзадтиаты Анисимы зарæггæнджыты къорд, вокалон-инструменталон ансамбль «Айзæлд», Колыты Аксойы номыл Аивæдты лицейы ансамбль «Скифтæ» æмæ æндæртæ.