Nog adres

Сæвæрдтой цырт Советон Цæдисы хъайтарæн

img_4191.jpg Стыр Уæлахизы бæрæгбоны цытæн Советон Цæдисы хъайтар, хæдтæхæгскъæрæг Остъаты Алекси Егоры фырты номыл Дзауы районы Сохты хъæуы æвæрд æрцыдис цырт. Стыр Фыдыбæстæйон хæсты хъайтары цырт байгом кæныны церемони уыдис 5-æм майы. Цытджын церемонийы хайад райстой РХИ-йы Хицауады Сæрдар Хъуылымбегты Доменти, РХИ-йы Парламенты минæвæрттæ, Хуссар Ирыстоны Уæрæсейы Федерацийы æххæстбарджын минæвар Къарджиаты Эльбрус, Стыр Фыдыбæстæйон хæсты ветерантæ цалдæрæй, ми-нистрадтæ æмæ ведомствоты минæвæрттæ, Дзауы районы администрацийы кусджытæ Чилæхсаты Владимиры сæргълæудæй. Афтæ ма æрбацыдысты Остъаты мыггаг æмæ хъайтарæн йæхи хæстæджытæ.
Цырт байгом кæныны церемонийы фæстæ кадджын хъараул цытджын æгъдауæй æмæхст фæкодтой. Уый фæстæ мадзалы райдианы нæ бæстæйы сæргълæууæг Тыбылты Леониды номæй æмæ РХИ-йы Хицауады номæй Хъуылымбегты Доменти бæрæгбонон арфæ ракодта æрæмбырдуæвджытæн Стыр Уæлахизы боны цытæн, Остъаты Алексийы номыл цы цырт байгом кодтой, уый сæраппонд. «70 азы размæ милуангай адæм рахызтысты хæстон азты карз фæлварæнты сæрты æмæ фæуæлахиз сты XX æнусы иууыл карздæр æмæ тугкалæн ныхмæлæуды.9-æм май æнустæм баззайдзæн адæмæн æвæджиауы сгуыхтдзинады, национ сæрыстырдзинады бонæй. Ныртæккæйы æмæ фидæны фæлтæртæ мысдзысты хæсты быдыры тохгæнджыты хъайтардзинад. Мах алыхатт дæр сæрыстырæй кад кæнæм нæ хъæбатырты рухс нæмттæн. Уыцы хъæбатырты ’хсæн ис Остъаты Алексийы ном дæр, уый йæ сæр нывондæн æрхаста немыцаг фашисттимæ тохы. Уымæн йæ хъæбатырдзинад æмæ удуæлдайдзинады тыххæй лæвæрд æрцыд Советон Цæдисы хъайтары ном», — загъта Хицауады Сæрдар.
Хъуылымбегты Доменти ма йæ раныхасы бузныджы ныхæстæ загъта Остъаты Алексийы æввахс хиуæттæн, сæ хъæбатыр хæстонæн йæ ном кæй нæ рох кæнынц æмæ йын æй ацы ног æвæрд цырты руаджы кæй сæнусон кодтой.
Хицауады Сæрдар ма банысан кодта, зæгъгæ, ирон адæм дæр Стыр Уæрæсеимæ иумæ, æппæт Советон адæмимæ нæ фыдæлтæ кæй хæцыдысты немыцаг фашизмы ныхмæ æмæ йыл фæуæлахиз сты. «Хуссар Ирыстон дæр уæззау уавæры куы бахаудис, уæд ын стыр æххуыс бакодта æмæ дарддæр дæр æххуыс кæны Уæрæсейы Фе-дераци. Сæрбахъуыдыйы рæстæ-джы нæм алыварсонæй йе ’ххуысы къух кæй фæдаргъ кодта, сæрибардзинад æмæ нын хæдбардзинад кæй æрхаста, уый тыххæй сын мах абон зæгъæм стыр бузныг», — загъта Хъуылымбегты Доменти.
Стыр Уæлахизы бæрæгбоны æмæ Советон Цæдисы хъайтар Остъаты Алексийы номыл цырт байгом кæныны сæраппонд ма æппæт æрæмбырдуæвджытæн æмæ республикæйы адæмæн зæрдæбын арфæтæ ракодта Хуссар Ирыстоны Уæрæсейы Федерацийы Æххæст-барджын минæвар Къарджиаты Эльбрус дæр.
«Уæрæсейы Федерацийы æмæ Хуссар Ирыстоны адæмæн ацы бæрæгбон, ома, Стыр Уæлахиз у иууыл райдзастдæр æмæ стыр цины бæрæгбон. Остъаты Алексийы, Ирыстоны æппæт хъæбатыр хæстонты нæмттæ лæууынц алкæцы ирон лæджы зæрдæйы дæр. Уый у махæн не стырдæр хæс, цæмæй мах кад кæнæм Стыр Фыдыбæстæйон хæсты хæстонтæн, ветерантæн», — банысан кодта Къарджиаты Эльбрус.
Остъаты Алексийы хъæбулы хъæбул дæр раныхас кодта мадзалы æмæ цыбыртæй æрдзырдта куыд йæхи тыххæй, афтæ йæ фыды фыды хæстон архайдтыты уыцы хæстон цауыл тыххæй цы зоны, уыдæттыл дæр. Остъаты Тимофей йæхæдæг у æфсæддон сауджын æмæ йæ ныхæстæм гæсгæ тынг уарзы æфсæддон професси. Уый ма йæ раныхасы банысан кодта, ацы хъуыддаг ын тынг æхсызгон кæй уыдис æмæ стыр бузныджы ныхæстæ загъта æппæт æрæмбырдуæвджытæн дæр, ахæм стыр хъусдард кæй здахынц æрмæст Остъаты Алексийы цырт байгом кæныны мадзалмæ нæ, фæлæ ма Стыр Уæлахизы 70 азы бæрæгбоны мадзæлттæм дæр. «Хорз уаид æмæ ахæм цыртытæ æмæ цыртдзæвæнтæ фылдæр æвæрд куы цæуиккой куыд Хуссар Ирыстоны, афтæ Цæгаты дæр, цæмæй сомбоны фæлтæртæ зоной æмæ кад кæной Стыр Фыдыбæстæйон хæсты хъайтартæн», — загъта Остъаты Тимофей.
Æрæмбырдуæвджытæ æмырæй алæугæйæ ссардтой Стыр Фыдыбæстæйон хæсты фæмардуæвджыты рухс нæмттæ æмæ уый фæстæ мадзал адарддæр кодтой ирон зарджытæ æмæ кафтытæй бынæттон сфæлдыстадон коллективтæ.
ЦХУЫРБАТЫ Ларисæ