Nog adres

Дунеон турнир Президенты кубок рамбулыныл

boks_1.jpg
Цхинвалы уагъд æрцыд Президенты Кубок рамбулыны сæраппонд 1-аг дунеон турнир боксæй, цыран хайад райстой дунейы алы бæстæты спортсментæ, уыцы нымæцы Уæрæсейы Федерацийæ, Республикæ Цæгат Ирыстон-Алани, Кæсæг-Балхъары Республикæ, Приднестровье, Азербайджан, Хъыргъыстан, Таджикистан, Ангола, Норвеги æмæ Чехийæ. Тохтæ цыдысты РХИ-йы Хицауады рабадтыты стыр залы, цыран сценæйыл æвæрд æрцыдис ринг. Ерыстæ стыр цымыдисдзинад сæвзæрын кодтой спортуарзджытæм. Турнир байгом кæныны церемонийы раныхас кодтой Фæсивæдон политикæ, спорт æмæ туризмы хъуыддæгты фæдыл комитеты сæрдар Зассеты Сергей æмæ Хуссар Ирыстоны Боксы федерацийы Президенты фыццаг хæдивæг Сланты Витали.

Ирон æгъдаумæ гæсгæ сымбæлдысты турниры цытджын уазджытæй сæ иу - америкæйаг проумоутер Лео Каралинскийыл.
Ерыстæ дих уыдысты дыууæ хайыл. Фыццаджы ерыс кодтой æнæпрофес-сионалонтæ, дыккаджы та - профессионалтæ.

Спортуарзджытæ федтой 9 тохы. Æрæмбырдуæвджытæм стыр цымыдисдзинад сæвзæрын кодта хуссарирыстойнаг боксер Плиты Мараты æмæ кæсæг-балхъайраг Залим Кишевы тох. Ам тæрхонгæнджытæ уæлахиздзауыл банымадтой ирон спортсмены. Фæстæдæр уый нымад æрцыд турниры хуыздæр боксерыл æмæ йæ Президент схорзæхджын кодта сæрмагонд Кубокæй.
Тохæй тохы 'хсæн азарыдысты эстрадæйы стъалытæ Бекъойты Вано æмæ Елинел Наварро. Уый фæстæ райдыдтой профессионалон боксерты тохтæ.
Рингмæ фыццаг рахызтысты Азербайджаны минæвар Ильдар Гасанов æмæ Анголайы боксер Рамиру Жуштину. Уыдон дыууæ дæр æрмæст бæрзонд цæттæдзинад нæ равдыстой, фæлæ ма бæрзонд актерон дæсныйад дæр, кæцы тынг фæцыд æрæмбырдуæвджыты зæрдæмæ.
Дарддæр рингмæ рахызтысты æвзонг курдиатджын боксер Тедеты Сослан æмæ таджикистайнаг боксер Фирдас Зукхуршоев. Спортуарзджытæ, кæй зæгъын æй хъæуы, æнхъæлмæ кастысты цхинвайлаг лæппу йæ ныхмæлæууæджы нокауты кæй арвит-дзæн, фæлæ уыцы хъуыддаг афтæ тагъд æрцæудзæн, уый æнхъæл ничи уыдис. Тохы 10 секундыл Сосланы тыхджын цæфы фæстæ Таджикистаны минæвар уыд нокауты.
Хуссар Ирыстонмæ æрцæуæг проумотрерон компани «Урал бокс промоушн»-ы директор Алексей Васильев ма уыд 2012 азы Цхинвалы цы профессионалон боксы изæр уыд, уым. Уый куыд банысан кодта, афтæмæй уыцы турниримæ абаргæйæ, ныр йæ организаци бæрæг хуыздæр уыд.
Турниры сæйраг тохы фембæлдысты дунеон боксы советы версимæ гæсгæ, фæсивæды 'хсæн дунейы чемпион æмæ дунеон боксы федерацимæ гæсгæ Европæйы чемпион Гасситы Мурат æмæ Норвегийы спортивон кад хъахъхъæнæг Даниил Перетятько. Банысан кæнын хъæуы уый, æмæ Перетятько кæй у фæлтæрдджын боксер, уый йæ рæстæджы тох кодта ахæм зындгонд боксертимæ, куыд Дэвид Чисаро æмæ Марко Хукимæ. Фæлæ Муратимæ тохы ирон боксер разынд бæрæг тыхджындæр. Фыццаг раунды Мурат нокдауны арвыста йæ ныхмæлæууæджы. Уый фæстæ норвегиаг боксеры секунданттæ нал сразы сты тох адарддæр кæныныл æмæ афтæмæй Гасситы Мурат ноджы фæхуыздæр кодта йæ профессионалон рекорд. Ныр уый ауагъта 17 тохы æмæ уыдонæй алкæцыйы дæр фæуæлахиз.
Сæйраг тохы хайадисджыты схорзæхджын кодта республикæйы Президент Тыбылты Леонид йæхæдæг. Афтæ ма паддзахады сæргълæууæг раарфæ кодта æрæмбырдуæвджытæн ахæм рæсугъд спортивон бæрæгбоны тыххæй æмæ банысан кодта, дарддæр дæр уагъд кæй цæудзысты ахæм масштабон спортивон ерыстæ.
«Хуссар Ирыстон сæрыстыр у йе спротсментæй æмæ сын алы хатт дæр цин кæны се 'нтыстытыл. Абон махмæ бирæ аккаг спортсментæ ис, кæцыты 'хсæн ис Гасситы Мурат дæр. Æз бузныг зæгъын ацы спортсмены тренертæн, кæцытæ уæлахиз хæссынц нæ Райгуырæн бæстæйæн», - загъта Президент.
Кæронбæттæны Хуссар Ирыстоны адæмон артист Дзадтиаты Анисимы къухдариуæгады бын националон зарæг сæххæст кодта Президенты цур хор. Турниры хайадисджытæ иууыл иумæ зæрдылдарынæн Президенти-мæ систой сæ къамтæ.
ХУРИТЫ Батрадз