Nog adres

Сабитæ хъуамæ зоной сæ истори

Нæ республикæ расидыны боны цытæн цы бирæ мадзæлттæ уагъд цæуы, уыдоны нымæцы ис горæты æмæ хъæуты скъолаты патриотикон хъомылады уроктæ уадзын. Сывæллæтимæ æмбæлынц нæ республикæйы бæрнон кусджытæ, æхсæнады, интеллигенцийы минæвæрттæ.
Цыфæнды бæрæгбон æмæ зæрдылдаринаг цауты дæр æнæбанысангæнгæ никуы фæцис нæ горæты æвзæнгты библиотекæйы коллектив. Библиотекæйы директор Тъотъоты Ленæ æмæ йе 'мкусджытæ зæрдиагæй аудынц, æвзонг фæсивæдæн библиотекæйы фæрцы лæггад кæныны æмрæнхъ сæ духовон хъомыладыл дæр. Кæд сын уавæртæ нæй, цы къуындæг æмæ æнуд ныккæндгонды кусынц, уым фезмæлæн нæй, уæддæр уавæрты æфсон никуы ницы фæкодтой алы зындгонд фыссæджы, аивады архайæджы юбилей дæр банысан кæнынц зæрдиагæй. Сабитæн ам у сæ дыккаг хæдзары хуызæн, уымæн æмæ ам ис сæ хъомыладон артдзæстытæй сæ иу.

Ныр дæр та, республикæйы бон нысан кæныны бæрæгбонон мадзæлтты фæлгæтты 18 сентябры ауагътой патриотикон хъомылады урок. Ардæм фæхуыдтой Тыбылты Алыксандры номыл паддзахадон университеты философийы кафедрæйы сæргълæууæг Гæбæраты Анатоли, Хуссар Ирыстоны Фысджыты цæдисы сæрдар Хъазиты Мелитон æмæ газет Хурзæрины сæйраг редактор Гæбæраты Юрийы.
Уазджытæ сабитæн лæмбынæг æрдзырдтой хæдбардзинад расидыны историйыл, хæдбардзинад расидын нæ æнæмæнг кæй хъуыд. Ахæм къахдзæф акæнын нысан кодта, Хуссар Ирыстоны политикон, культурон æмæ физикон скуынæгæй фервæзын кæныны иунæг фæрæз.
Мадзалы хайад райста æмæ дзы раныхас кодта нæ республикæйы культурæйы министры хæдивæг Дзеранты Джульеттæ.